| Ein vogel heizt pellicanus:
swenne der fruht gewinnet,
alze sere er die minnet:
in twinget siner triwe gelust
daz er bizet durch sin selbes brust,
unt lætz bluot den jungen in den munt:
er stirbet an der selben stunt.
do gewunnen wir des vogels bluot,
ob uns sin triwe wære guot,
unt strichens an die wunden
so wir beste kunden.
daz moht uns niht gehelfen sus.
ein tier heizt monicirus:
daz erkennt der meide rein so groz
daz es slæfet uf der meide schoz.
wir gewunn des tieres herzen
über des küneges smerzen.
wir nahmen den karfunkelstein
uf des selben tieres hirnbein,
Der da wehset under sime horn.
wir bestrichen die wunden vorn,
und besouften den stein drinne gar:
diu wunde was et lüppec var. |
Min clare süeze bea amis,
so durchliuhtic was sin pris
mit rehter werdekeite ger,
ez wære dirre oder der,
die muoter ie gebaren
bi siner zite jaren,
die muosn im jehen werdekeit
die ander pris nie überstreit.
er was in quecprunne der tugent,
mit also berhafter jugent
bewart von valscher pfliehte.
uz der vinster gein dem liehte
het er sich enblecket,
sinen pris so hoch gestecket,
daz in niemen kunde erreichen,
den valscheit möhte erweichen.
sin pris hoch wahsen kunde,
daz d'andern waren drunde,
uz sines herzen kerne.
wie louft ob al den sternen
der snelle Satrunus?
der triuwe ein monizirus,
sit ich die warheit sprechen kan,
sus was min erwünschet man.
daz tier die meide solten klagn:
ez wirt doch reinekeit erslagn.
ich was sin herze, er was min lip:
den vlos ich flüstebærez wip.
in sluoc der künec Gramoflanz,
von dem ir füeret disen kranz. |
